વિધવા ભાગ-૫ દિયર-ભાભી

(રાગ-સવામણ સોનું ને અધમણ રૂપું...)

એક દિન બોલ્‍યો મારો લાડલો દેરીડો,

ભાભી તમે ધૈર્યની દેવી ! હો, રાજ

   ભાભી રે મારા મનમાં સમાણાં.

ભાભી તમારી પાસે નોકર બની રહું,

સેવાની તો વાત શી કહેવી ! હો, રાજ

   ભાભી રે મારા મનમાં સમાણાં.

કહો તો ભાભી કૂવેથી પાણીડાં હું ભરું,

સફાઈ કરું હું કહો એવી ! હો, રાજ

   ભાભી રે મારા મનમાં સમાણાં.

વહાલાં ભાભી કદી' મુજથી ન રૂઠશો,

ભૂલ થાય તો માફ કરી દેવી ! હો, રાજ

   ભાભી રે મારા મનમાં સમાણાં.

               *

મારો લાડલો દેરીડો છે આવો હઠીલો,

શીદને માને મુજને દેવી ! હો, રાજ

   ભાભી હું એના મનમાં સમાણી.

લાડલા દેરીડાને કામ શીદ કરાવું,

નથી કંઈ હું નમાલા જેવી ! હો, રાજ

   ભાભી હું એના મનમાં સમાણી.

નિશાપતિ જેવું એનું મુખડું ચમકે,

બુદ્ધિની તો વાત શી કહેવી ! હો, રાજ

   ભાભી હું એના મનમાં સમાણી.

મારા દેરીડાને કદીયે આંચ ન આવે,

આ દેરાણી તો શોધું હું એવી ! હો, રાજ

   ભાભી હું એના મનમાં સમાણી.