વિધવા ભાગ-18 સાસુ ઉર્ફે માતાની વિદાય
વિધવા ભાગ-18 સાસુ ઉર્ફે માતાની વિદાય
બેટા રે ! વિધાતાના લેખ કોઈથી ન ભૂસાય,
સંસાર સ્ત્રીનો સહારો કે'વાય;
જેનો સંસાર રોળાય એ સ્ત્રી ઠેબાં ખાતી જાય,
સંસાર સ્ત્રીનો સહારો કે'વાય !
વિધવા થવાના લખ્યા હશે તારા ભાગ્યે લેખ,
ફરી પરણવા તારે મારી શકે કોણ મેખ ?
બેટા રે ! તારી વિદાય મારાથી કેમ ખમાય,
સંસાર સ્ત્રીનો સહારો કે'વાય;
જેનો સંસાર રોળાય એને દુઃખડાં ન માય, સંસાર...
નવા સંસારમાં જઈ તું રે'જે સદા હસતી,
પતિદેવને સાથ દેજે સદા તું મલકતી;
બેટા રે ! જીવન તારું દુઃખમાં ન રોળાય,
સંસાર સ્ત્રીનો સહારો કે'વાય;
સંસાર વિનાની નારી વામણી ખૂબ ગણાય, સંસાર...
સાસુ-સસરાનો પડયો બોલ તું હોંશે પાળજે,
ખંતથી સેવા કરજે એના પગ પખાળજે;
બેટા રે ! સાસરિયે રહેવું શાંતિથી સદાય,
સંસાર સ્ત્રીનો સહારો કે'વાય;
એવાં કામ કરવાં જેથી બધાં હરખાય, સંસાર...
ઈશ્વર તને જીવનમાં સદાયે આપે સાથ,
મુશ્કેલી ન આવે હેમખેમ રહે પ્રાણનાથ;
બેટા રે ! મન તારું જેથી કદી'યે ન મૂંઝાય,
સંસાર સ્ત્રીનો સહારો કે'વાય;
હરપળે જીવનમાં કરે સંસાર સહાય, સંસાર.