વિધવા ભાગ-15 વિધવા વિવાહ ગીત-4

(રાગ-સીતાને તોરણ રામ પધાર્યા...)

વિધવાને તોરણે વર પધાર્યા,

     સાસુ પોંખે ને વર હરખાય;

મોઢું મલક મલક વર કરે,

     જાનડિયું ઊભી ત્‍યાં ગીતો ગાય.

ધીમે ધીમે હાલો વીર વરરાજા,

     સહિયર સૌ પાછળ રૈ જાય;

શુભ ચોઘડિયું સચવાઈ જાશે,

     ઉતાવળમાં પગ લથડાય.

લલાટે કાજળનો ડાઘ વરરાજા,

     નજર કોઈની લાગી ન જાય;

ખિસ્‍સામાં સોય અને લીંબુ છે રાખ્‍યાં,

     ઓછાયો કોઈનો અડી ન જાય.

દાદાએ હેતે વધાવ્‍યા વરરાજા,

     ને માતા વહાલ કરતી જાય;

બહેન હોંશે હોંશે ગીતડાં ગાતી,

     ને જલદી ડગલાં ભરતી જાય.

ઢોલ ઢબૂકે ને શરણાઈ વાગે,

     મંગળગીતોનો અવાજ થાય;

વરે તો હાથમાં તલવાર રાખી,

     મસ્‍તકે સુંદર ફેંટો સોહાય.

જાનની રંગત તો જામી ગઈ છે,

     સૌના આનંદનો પાર ન માય;

વિધવાને તો આજે દેવ આવ્‍યા છે,

     ઓઢણીમાં તો મોઢું મલકાય.