તું અને હું

તુંં અને હું બે અલગ ડાળના પંખી

વચ્ચે આ મઘમઘતું ખીલતું એ શું ?

શબ્દો તો રોજ અહીં ખીલતા વિખરાતા

મૌન બની કલબલતું ઊગતું એ શું ? 

સોનેરી પર્ણોની મખમલી સેજ પર 

ઝળહળતી મોતીની માયા,

લીલેરી ધરતીની રંગરેલી રેત પર 

હરખાતી પુષ્પોની છાયા,

માયા અને છાયામાં રહેતા નિરંતર

સ્પર્શે છલકતા એ સ્પંદનનું શું ? 

સપનાની નગરીને સોનાનો મહેલ અહીં

સરગમથી ગુંજતા સંગીતના સૂર

નમણા નયનોને આકાશે ઊગ્યા અહીં

રણઝણ છનકતા પગરવના પૂર

સૂર અને પૂર તો વહેતા નિરંતર

એકમેકમાં ધબકતા આ શ્વાસોનું શું ?

તુંં અને હું બે અલગ ડાળના પંખી

વચ્ચે આ મઘમઘતું મહેંકતું એ શું ?

શબ્દો તો રોજ અહીં ખીલતા વિખરાતા

મૌન બની કલબલતું ચહેકતું એ શું ?