તારી યાદો

હતી હું બળતા બપોરથી બેખબર તારી યાદો

હતી કયાં વૈશાખી વાયરાની અસર તારી યાદો,

દઝાડી ન શકી મને ઉનાળાની લૂ જરા પણ,

એવી હું શીતળતાથી તરબતર તારી યાદો,

મુરઝાવું એ મારો સ્વભાવ ક્યાં હતો ?

મહોર્યો હતો ગુલમહોર મારી અંદર તારી યાદો,

ન લાગતો આકરો સૂરજ કે ન લાગ્યા જલદ કિરણો,

બસ બધું ડોલર સમું સુગંધી ભીતર તારી યાદો,

મીરાને થવા દે ખ્યાતનામ કૃષ્ણ સંગાથે,

રહેવા દે દરેક ૠતુએ 'ઝંખના' સભર તારી યાદો.