તારા પ્રીતની વાતો ના રે અજાણી

તારા પ્રીતની વાતો ના રે અજાણી.…

વૃન્દાવન વાટે, યમુનાજી ઘાટે

થોડી થોડી જાણી ને હૈયે સમાણી

કાનુડા રે…

તારા પ્રીતની વાતો ના રે અજાણી.

સૂણો રે યમુનાજી, બોલે કદમની ડાળી

આજ ગોપલી, રાધા રાણી ના ભાળી

…ના અમે ભાળી ભાળી રે ભાળી.

ત્યાં વાગી વાંસલડી, નાચે ગાવલડી

દીઠી દોડતી વાટે વ્રજરાણી

કાનુડા રે…

તારા પ્રીતની વાતો ના રે અજાણી.

પૂછે ચાંદલિયો, શરદ પૂનમિયો

કેમ કરી નચાવશે રે રૂપલીયો

અડધી રાતલડી, ઘેલી ગોપલડી

સૂણી વેણુ ને ભૂલી રે ભાન ભોળી

કાનુડા રે…

તારા પ્રીતની વાતો ના રે અજાણી.

કોઈ કહે મારો, કોઈ કહે સૌનો

રે ભૂલી ગયો કે એ છે વૈકુંઠનો

જશોદા માવલડી, ભક્તોની આંખલડી

રિઝ્યો તુલસીએ કા'નો વનમાળી,

કાનુડા રે…

તારા પ્રીતની વાતો ના રે અજાણી.

વૃન્દાવન વાટે, યમુનાજી ઘાટે

થોડી થોડી જાણી ને હૈયે સમાણી

કાનુડા રે…

તારા પ્રીતની વાતો ના રે અજાણી.