સંકલ્પ

મળ્યો છે આ સમય સહુ યાદને કંડારવા કાજે,

ભૂલાયેલાં જ સંસ્મરણો ફરી સંભારવા કાજે.

ગગનને આંબવા સંકલ્પ મારો ખૂબ મક્કમ છે,

સકળ આ વાદળાં ઠેલી નુપુર ઝંકારવા કાજે.

કરું હું સ્મિતની લ્હાણી તો મહેકે આ ચમન ચિત્તનું,

હરી ઈચ્છા હલેસે કશ્તી આ હંકારવા કાજે.

પ્રણય કાગળ કલમનો છે અમર આખી જ દુનિયામાં,

ધરી શબ્દો અલંકારો કવન શૃંગારવા કાજે.

મને કનડે પરિસ્થિતિ 'ઋજુ' મચક નહીં આપે,

બનીને પાર્થ ભવરણમાં ધનુષ ટંકારવા કાજે.