શું કરું?
શું કરું?


રોજ દિ ઊગતા ઊગે, એ ઝંખનાનું શું કરું?
થઈને આંગળીયાત આવે, વેદનાનું શું કરું ?
જો વધારો કે ઘટાડો થાય તો સમજણ પડે
એકસરખી રહે છે, એ સંભાવનાનું શું કરું ?
આખરે મંદિરમાં મૂર્તિ એટલું બોલી ઊઠી
થાય કેવળ હોઠથી, એ પ્રાર્થનાનું શું કરું ?
સાત સાગર ખુદ હવે ભયભીત છે તોફાનથી
છે યુગોથી, ડૂબવાની કામનાનું શું કરું ?
એક બે કારણ હૃદય ધબકાવવા પણ જોઈએ
એ વિના તો હાથપગની ચેતનાનું શું કરું ?