સેકન્ડ કાંટો...

દિવસ હોય કે રાત ક્યાં એ રોકાય છે?

દેહેથી છે સાવ પાતળો તોય ભાગ્યો જાય છે,

આ સેકન્ડ કાંટો સમય ફેરવતો જાય છે…

એક આંટો મારીને મિનિટો બદલી નાખે છે,

પછી એમ જ કલાકો ફેરવતો જાય છે,

આ સેકન્ડ કાંટો સમય ફેરવતો જાય છે…

દુબળાંને કોઈ ગણે નહિ એથી શું થયું?

એક ડગલે એ કિસ્મત પલટતો જાય છે,

આ સેકન્ડ કાંટો સમય ફેરવતો જાય છે…

અવાજ કરે એથી કાઢીને ફેંકી ન દેવાય,

નહિતર સમયને થોભાવતો જાય છે,

આ સેકન્ડ કાંટો સમય ફેરવતો જાય છે…

આમ બધાં પાસે જઈને શું કરતો હશે?

લાગે છે બારેયને ઠેકાણે કરતો જાય છે,

આ સેકન્ડ કાંટો સમય ફેરવતો જાય છે…

કેટલાયને ભરતીને ઓટ દેખાડીને,

‘અર્જુન’ને પોતાની કિંમત કહેતો જાય છે,

આ સેકન્ડ કાંટો સમય ફેરવતો જાય છે…!