કોણ મહાન

સાગરનું એક મોજુ તું

ને એક નાનો પરપોટો હું

ના,ના કર અભિમાન તું

કે તું મોટો ને નાનો હું

હસી લે હસી લે મુજ પર તું

હું ક્ષણિક, નથી ચિરંજીવ તું

સહજમાં ફૂટી જઈશ હું ને

વામનમાંથી બનીશ વિરાટ હું

મુક્તિ પામીશ જલ્દી હું

નાનું પણ સુખી છું હું.

દોડી દોડી અથડાય તું

પત્થરો સાથે અફળાય તું

મથી મથી બને નાનું મોજું

ને ગોળ ગોળ ફર્યા કરે તું

અસંખ્ય પરપોટામાં વિરમે તું

અંતે બને એક પરપોટો તું.

શીદને કરે ગુમાન મોજાં તું

અંતે સાગરમાં જ ભળે તું

વિરાટમાંથી બનશે વામન તું

તું મોજું હું પરપોટો પણ

એક જ જળનાં અંશ હું ને તું

જો જો મહાન નથી હું કે તું.