સાચવીને બેઠી છું

લાગણીઓ થોડી પડતર સાચવીને બેઠી છું,

આંખમાં એકાદ કસ્તર સાચવીને બેઠી છું,

એમ તો તૂટી ગયા છે ગઢ એ સંબંધો તણા,

કિંમતી એના સૌ જડતર સાચવીને બેઠી છું,

મોજથી રમ્યા’તા ઘરઘરની રમત, સંગે અમે,

હૈયે મારા એ જ બચપણ સાચવીને બેઠી છું,

ક્યાં અહીં મમ વેદનાને સાંભળે એવુ મળે ?

ભીંત પર એથી હું દર્પણ સાચવીને બેઠી છું,

આશને મારી, સમયની ધાર કાપ્યા છો કરે,

કાળજે ધીરજના બખ્તર સાચવીને બેઠી છું,

એક પ્રસંગે હું પણ લીસી ગલીમાં લપસી'તી,

દોષમાં એ એક સ્ખલન સાચવીને બેઠી છું,

આંગણે કૂંપળ ફૂટી તો પાનખર પણ આવશે,

જીંદગીમાં એ જ સમજણ સાચવીને બેઠી છું,

એ છે? કે ક્યાં છે ? નથી પ્રશ્નો કર્યા એવા કદી,

મારી અંદર ખુદનો ઈશ્વર સાચવીને બેઠી છું.