રથડે બીરાજજો રણછોડ

ઝૂલે છે હાથીડા ને ઝૂમે છે લોક

રથડે બીરાજજો રણછોડ

દઈએ ઓવારણાં અષાઢી બીજનાં

પધારીને પૂરજો રે કોડ

 

બહેની સુભદ્રા ને વીરા બલભદ્રજી

મલકે જાધવ કુળની જોડ

અમારી સગાઈ સવાઈ માધવજી

શંખ વાગે ને વધાવે ઢોલ……રથડે બીરાજજો રણછોડ

 

નગર અમારું આજ ગોકુળ વૃંદાવન

તમે છોગાળા અમે છેલ

દર્શન તમારાં રૂડાં રે જગન્નાથજી

અક્ષત ગુલાલ માથે હેલ,

 

પ્રેમથી પધરાવશું હૈયામાં લાલજી

છૂટ્યા અજંપા લૂંટ્યા શોર

લાલ પીળા રંગે શોભે આ રથજી

હળવે હાલે હરિ તરબોળ

રથડે બીરાજજો રણછોડ ..મારા રથડે બીરાજજો રણછોડ.