રાખડી

ભાઈનાં એ હાથ પર સોહાય કેવી રાખડી !

સ્નેહ જોઈ બેનનો મલકાય કેવી રાખડી !

રંગબેરંગી સજી શણગાર બંધાતી સદા,

લાગણીનાં તાંતણે ગૂંથાય કેવી રાખડી !

ભાઈના ભાલે તિલક ને કંકુ ચોખા સાથમાં,

સ્નેહના એ નીરથી છલકાય કેવી રાખડી !

રાત દિન તો બેન કરતી રોજ મંગલ કામના,

ભાઈનું શુભ ઈચ્છતી હરખાય કેવી રાખડી !

ભાઈ વિરપસલી અનોખી બેનને આપે ઘણી,

મોલ જેના ના કદી અંકાય, કેવી રાખડી !

બેન લે ઓવારણાં જ્યાં હેતથી ભાઈ તણાં,

વ્હાલના વરસાદથી ભીંજાય કેવી રાખડી !

સાંભળે જ્યારે ખમા મારા વિરાને વ્હાલથી,

પ્રેમના એ "ગીત"થી ગૂંજાય કેવી રાખડી !