જિંદગી

જિંદગી ગમની લગાવે નિત કતારો,

અનુભવે ક્યારેક જ મન હાશકારો,

જે કરે પૂરી બધી ઈચ્છાઓ એવો,

કેમ ખરતો જ નથી કોઈ સિતારો ?

છો ને રોજે રોજ બંધાતો નવો જ,

કેમ તૂટે આપણાં મનનો મિનારો ?

ના કદીયે કોઈ દેખાતી છતાં પણ,

ક્યાંક તો મનમાં પડે છે જ દરારો,

આવતી ના, છે ખુશીઓ ખુબ જિદ્દી,

છો ને આપીએ હૃદયથી આવકારો,

આંખ દ્વારે આવતાં વણનોતર્યા એ,

આંસુઓ જાણે બન્યાં છે શાહુકારો,

ના કદીયે ખાલી તું કરજે હે ઈશ્વર !

"ગીત" પાસે પ્રેમનો જે છે પટારો.