અવતરું

હે ખુદા ! બંદગી એક કાયમ કરું,

જ્યાં સુધી હું જીવું નિત્ય તુજને સ્મરું,

ક્યાંક ઈચ્છાઓ કોઈની કરવા પૂરી,

આભમાંથી સિતારો કો' થઈને ખરું,

દીનદુ:ખિયાનાં નિર્મૂળ સૌ દુ:ખ કરી,

સૌની આંખોનાં અશ્રુઓ સઘળાં હરું,

જિંદગીની સફરમાં મળે એમને,

મધમીઠાં સ્નેહકેરા સુમન ખુબ ધરું,

માણસાઈની રાહે જ ચાલું સદા,

ઝોળી અઢળક ખુશીથી બધાની ભરું,

પાપનું પોટલું ફેંકીને બસ પછી,

તો સરળતાથી સંસાર સાગર તરું,

લાગણીથી છલોછલ જે નિતરે હૃદય,

"ગીત" ત્યાં હોઠ પર સ્મિત થઈ અવતરું.