ફૂલોની રસમ

જગમાં ફૂલોની છે અનોખી રસમ,

હસે ને હસાવે, હસે ને હસાવે,

દૂર કરે ગમ, જગમાં..

ફૂલોની દુનિયા છે ભારે બહુરંગી,

એવાં મળી જાય, જાણે સુખ-દુ:ખના સંગી,

વાયુને મહેકાવે, વાયુને મહેકાવે,

છોડે એ ફોરમ, જગમાં..

ફૂલોની ફૂલવાડીનો અનોખો પરિવાર,

આનંદમાં લહેરાતાં, દુ:ખ ન લગાર,

મસ્તીમાં રચાવે, મસ્તીમાં રચાવે,

નાચે છમછમ, જગમાં..

મધમાખી-કીટકોની મજાની બજાર,

હસી-ખુશી ફેલાવતાં પ્રેમ એ અપાર,

કામણ ફેલાવે, કામણ ફેલાવે,

ચમકે ચમ-ચમ, જગમાં..

ફૂલોની દુનિયામાં કરો જો નજર,

તેમાં ડૂબો તો થાય નશાની અસર,

રંગોથી સજાવે, રંગોથી સજાવે,

દુનિયા હરદમ, જગમાં..