સૂર્યમાં અંધકાર આવ્યો છે
સૂર્યમાં અંધકાર આવ્યો છે
સૂર્યમાં અંધકાર આવ્યો છે,
સાવ કેવો પ્રચાર આવ્યો છે,
આમ જોતા જ કયાં સુધી રહેવું,
મનને એવો વિચાર આવ્યો છે,
સાવ કોરો ભલે લખે કાગળ,
લાગે નૂતન પ્રકાર આવ્યો છે,
સાવ ફોગટ નથી મળ્યું જીવન,
શ્વાસ પણ, આ ઉધાર આવ્યો છે,
શબ્દને જેમ જેમ માંજૂ છું,
એમ એમાં નિખાર આવ્યો છે,
ના, કશું શેષ આપણી વચ્ચે,
તો ય શાને હકાર આવ્યો છે,
જયોતિ પણ હું જ છું તિમિર પણ હું,
સામસામો પ્રહાર આવ્યો છે.