મન તો કહે છે
મન તો કહે છે
આપું છું દિલને દિલાસા કે એ આવશે,
નહીં જામે જાજમ મથુરાની એ આવશે,
હશે ચારેકોર અજવાળા અજવાળા,
ઊંઘ નહીં આવે જો રાત્રે એ આવશે,
સિતાર ઢોલક ને બીજાં વાજિન્ત્રો અનેક,
તલપ લાગશે હોઠને વાંસળીની એ આવશે,
રાજા મહારાજા કહી ને નમતું સૌ કોઈ,
માખણચોર કહ્યાનું સાંભરશે એ આવશે,
હાથી ઘોડા કેરા રૂડા રથડાઓ હજાર ગણા,
દેખાય ક્યાક ગાય સંગ ગોવાળ એ આવશે,
મોંઘા મહેલોનો રાજા મારો મોંઘેરો માધવ,
રેઢા પડશે ધૂળ ઢેફા ગોકુળના એ આવશે,
ફાગણિયા રંગ ફેલાશે કેસુડા લહેરાશે,
રાધા રૂપી રંગ નહીં દેખાય એ આવશે,
હું જાણું છું નહીં આવે પાછો એ કાનુડો,
પણ મનને શું મન તો કહે છે એ આવશે !