મન ગુલાલ

છાંટી એ પિચકારી કેરી ધાર,

મન ગુલાલ થઈ ગયું..!

મહેંકી ફાગણની આ રસધાર,

મન ગુલાલ થઈ ગયું..!

આ વગડે ખીલ્યા વનફૂલ ને,

આંબે મોર કેરી ઘટમાળ.

કેડીઓ થઈ ભલે સૂની પણ,

મન ગુલાલ થઈ ગયું..!

અણીયાળી આંખોના ખૂણે,

રંગોની જ ભરમાર.

તપતો સતાવે આ સલિલ પણ,

મન ગુલાલ થઈ ગયું..!

વસંતના પડઘા હજુ ગુંજે ને,

હૈયે પ્રેમ ભર્યો થડકાર.

ઢળતી આ રાત ઘણી મોડી પણ,

મન ગુલાલ થઈ ગયું..!

પિયુનો રંગ વળી પ્રેમનો કસુંબ,

નિત વાગે એજ ભણકાર.

ફોરમ આ વહેતી કેસુડા કેરી ને,

મન ગુલાલ થઈ ગયું..!

સ્નેહ કેરી છાલકને હેતની જ છાંટ,

રંગ રસનો આવ્યો તહેવાર.

ભીંજવે છે હૈયું આજ હૈયાને ને,

મન ગુલાલ થઈ ગયું..!

છાંટી એ પિચકારી કેરી ધાર,

મન ગુલાલ થઈ ગયું..!

મહેંકી ફાગણની આ રસધાર,

મન ગુલાલ થઈ ગયું..!