માસૂમ ને સુંદર કળી

રણકાર કરતી દીકરી ! ધબકાર થઈ મુજ ગૃહ વસે, 

માસૂમ ને સુંદર કળી ! વરદાન થઈ મુજ ગૃહ વસે,

નિર્દોષતા લખલૂટ લૂંટાવી, જગત નાથે મહીં,

સાક્ષાત એ લક્ષ્મી સમી, અવતાર થઈ મુજ ગૃહ વસે,

કોમળ હૃદય પાપા તણું ! મમતા ઉરે માતા સમી,

ઓજસ અનોખા આંખમાં, શણગાર થઈ મુજ ગૃહ વસે,

રિસાય પળ પળ ને વળી ક્ષણમાં જતી રીઝાય પણ,

પાયલ તણો એ મીઠડો, ખનકાર થઈ મુજ ગૃહ વસે,

કાયમ કહેતી એ કદી પણ ગર્ભમાં ના મારશો, 

કોમળ ભલે 'શ્રી' તન છતાં, દમદાર થઈ મુજ ગૃહ વસે.