કવિનો અકાઉન્ટ-નંબર

બેંકની લાંબી હરોળમાં -

એક કપડાનો લાંબો થેલો ગળામાં લટકાવી ઉભા રહેલ -

એક ભાઈના થેલામાં !

એક બે કાવ્યસંગ્રહો વચ્ચે દબાયેલી હાલતમાં મળી

એક પાસબુક :

એના ખાતામાં કેટલી રકમ છે એ તમારે જાણવું છે ?

બરાબ્બર બાર લાખ લાગણી,દસ હજાર વેદના,પાંચસો સંવેદના ને એકવીસ પીડાઓ........

એના ખાતાનું જમા પાસું

એટલે કવિસંમેલનમાં મળેલ ચા-પાણીની રકમ અને ચા-પાણીનો ત્યાગ કરીને જમા કરેલ મુડી ,

કોઈ ટ્રસ્ટે પુસ્તક માટે આપેલ રાજીખૂશી.........

ને તેથીય વધુ તો એની જાવક-

એક કાવ્યસંગ્રહ માટે પાઈ પાઈનો ખર્ચો !

પોસ્ટ ને કુરિયર તો રોજના ......

ને દર મહિને થતો મેગેઝીન,સમાચાર પત્રોનું લવાજમ !

તેથી'ય રોમાંચક વાત તો એના ખાતામાં રમતી- લાગણીઓની નોટ !

સંવેદનના ચેક !

દુ:ખોથી ભરેલ ડેબિટ સાઈડ !

હળવી ક્ષણોની ક્રેડિટ સાઈડ !

ને બન્ને ને ટેલી કરવા મથતો એ પોતે !!!!

જાણવો છે એનો અકાઉન્ટ નંબર ????

જુઓ.................

કોઈને કે'તા નહીં હો !....

BOB956''ક××××××વિ××××××તા''