પપ્પા કહું કે ડેડી ?

બાપુજી કહું ? પપ્પા કહું ? કે કહું પ્યારથી ડેડી !

તમે જ મારા પગલે-પગલે બની જાઓ છે કેડી,

ગર્વભેર હું ચાલું તેથી આપ ઘસાતા જાઓ,

માણસને જેમ ઊંચે રાખે છે 'ચપ્પલની એડી',

સાત સૂરો ને લય-તાલમાં ઝૂમી રહ્યો છું આજે..

તમે જ આવી, મારા આ જીવનની સરગમ છેડી,

જ્યાં હું બેસું નિરાંતે, લઈ મૂંઝવણ-દર્દો-આશા

તમે જ મારી એવી કોઈ ભવ્ય ભાતની મેડી,

લીલા-લીલા ખેતર વચ્ચે હું મ્હાલું બસ તેથી,

તમે રહ્યા છો રાત-દિવસ આ સૂકી ધરતી ખેડી.