ખુલ્લું આકાશ

મન ભરીને જોવું મારે આ ખુલ્લું આકાશ,

આંખો માંડી કરવો મારે એક નવો પ્રવાસ.

રોજ સવારે સૂરજ સાથે ઉગમણે એ નહાતું,

પીળા રંગે પીઠી ચોળી મખમલીયું થઈ જાતું,

પવન સાથે વહેતું કરતું એક નવો ઉલ્લાસ,

મન ભરીને જોવું મારે આ ખુલ્લું આકાશ.

પહોર થતાં તો આસમાની વાઘા પહેરી લેશે,

સૂરજ સાથે ક્યારેક ક્યારેક વાદળ પાથરી બેસે,

વાતો કરતું લાગે એના ભેરુ સાથે ખાસ,

મન ભરીને જોવું મારે આ ખુલ્લું આકાશ.

છેક બપોરે આકરું થઈ સૂરજના વાદે ચડતું,

લાગે જાણે દુનિયા ઉપર ગુસ્સે થઈ બબડતું,

નાક ફુલાવી ભરડો લેતું, ભારે કરતું શ્વાસ,

મન ભરીને જોવું મારે આ ખુલ્લું આકાશ.

સાંજ ઢળે ને ત્યાં તો પાછું ડાહ્યુ ડમરું થાતું,

કેસરિયાળો રંગ ધરીને ગીત નવા કંઇ ગાતું,

એની સામે જોવું ત્યારે હોય નવો વિશ્વાસ,

મન ભરીને જોવું મારે આ ખુલ્લું આકાશ.