ખમ્મા ઘણી
ખમ્મા ઘણી
આ બલ્બથી આ ચાંદની ભરમાય તો ખમ્માં ઘણી.
આ કાચમાં ચકલી જરા, શરમાય તો ખમ્માં ઘણી.
એવું નથી કે જાદુગર ગાયબ બને આ દેશમાં,
જીત્યા પછી નેતા જરા દેખાય તો ખમ્માં ઘણી.
આ લોક તો લપટાય, જાહેરાતના આ દૌરમાં,
જો વાત આ એકાદ સાચી થાય તો ખમ્માં ઘણી.
લૂંટી રહ્યાં છે લૂંટનારા, આપણે જોયા કરી,
જો કોઇનાથી કાંઇ પણ બોલાય તો ખમ્માં ઘણી.
શ્રદ્ધાં બધાની પોષવા, ઈશ્વર અહીં જીવે મરે,
આ લોકના માનસ જરા બદલાય તો ખમ્માં ઘણી.
પુંજી ઉપર જીવે ઘણાં, આ દેશની કઠણાઇ છે,
પણ જો 'ધમલ' આ કર્મને પુજાય તો ખમ્માં ઘણી.