મહોબ્બત થઈ ગઈ
મહોબ્બત થઈ ગઈ
રોજ તમને જોઈ લેવાની જ આદત થઈ ગઈ.
શું કહું હું આપથી મુજને મહોબ્બત થઈ ગઈ.
કામ કંઈ કરવા નથી દેતો ચહેરો આપનો,
દ્રષ્ટિમાં ઘૂમ્યા કરો છો, કેવી હાલત થઈ ગઈ.
આપનું આ સ્મિત મુજને કેટલું ગમતું ભલા,
રોજ સામે આવવાની એટલે લત થઈ ગઈ.
કેટલું કામણ ભર્યું છે, આપની આ આંખમાં,
એ નશો મુજને ચડાવે, એમ ચાહત થઈ ગઈ.
બોલવાનું મન હતું પણ કાંઈ ના બોલી શકયો,
એટલે તો આ ગઝલ મુજ પ્રેમ બાબત થઈ ગઈ.
લાખ ભવ કુરબાન છે બસ, આપના આ પ્રેમ પર,
આપની આંખો 'ધમલ' સાચે જ જન્નત થઈ ગઈ.