જિંદગી

જીવવાને જીવંતતાથી તેં આપી'તી જિંદગી,

પ્રશ્ર્નો ઉકેલવામાં જ સદા ઉલઝાયેલો રહ્યો.

કેડી અનોખી કંડારવા તેં આપી'તી જિંદગી,

લપસણી રાહોમાં જ સદા અટવાયેલો રહ્યો.

સ્વની ઓળખ પામવા તેં આપી'તી જિંદગી,

મોહમાયાની જાળમાં જ સદા લપટાયેલો રહ્યો.

હકીકત સ્વીકારી જીવવા તેં આપી'તી જિંદગી,

વ્યર્થ શમણાંઓમાં જ સદા ભરમાયેલો રહ્યો.

મૃત્યુનો મર્મ જાણવા તેં આપી'તી જિંદગી,

મોતની કલ્પનાથી જ સદા ગભરાયેલો રહ્યો.

ખુદને ખુદા બનાવવા તેં આપી'તી જિંદગી,

ખુદને ઓળખવામાં જ સદા ગૂંચવાયેલો રહ્યો.