મને ફાવે નહીં

હું રહ્યો વર્ષોનો તરસ્યો એટલે મન માને નહીં,

આ આમ ટપક ટપક તમે વરસો એ મને ફાવે નહીં.

અહીંતો ડેલી પણ ડૂબે એવી હેલી જોઈએ,

આ નાનું અમથું ઝાપટું ચંચળ મનને ફાવે નહીં.

જોતા રહી જશો અફાટ પાણીમાં તરતો જોઈ,

આ ખાબોચીયામાં છબ છબ કરતા મને ફાવે નહીં.

ગામ ગલીયારા પણ છોડીને હું ચાલ્યો જઈશ,

આ અધૂરી પ્રીત કરતા આપણને ફાવે નહીં.

ભાગ્યના ઘરમાં પણ પડતું સૂર્યનું તેજ છું હું,

આ મીણબત્તી સમ જીવવું ખોળીયાને ફાવે નહીં.

પૂર્ણતા ભરી લે સમય તારો સાથ છોડે એ પહેલાં,

આ હૃદયને હવે ધરાતલ પર તારા વિના ફાવે નહીં.