હાસ્ય - રૂદન

તે દિવસે આમ્રડાળે,

કૂંજતી કોયલને, મેં પૂછ્યું

'તારો મધુર અવાજ

એ તારૂં હાસ્ય કે રૂદન

કેવી રીતે સમજાય ?'

ને કોયલે જવાબ આપ્યો,

'મને જોઈને એ વિચાર આવે કે,

ભગવાન કેટલો દયાળુ છે,

શ્યામ રંગનો અફસોસ ન થાય,

તે માટે દુનિયાભરની મીઠાશ,

એના કંઠમાં મૂકી દીધી છે,

તો માનજો કે હું હસી રહી છું,

પણ મને જોઈને એ વિચાર આવે કે,

ભગવાન કેટલો ક્રૂર છે,

સાતે સૂરોનું માધુર્ય કંઠમાં આપીને,

કાળા કોયલા જેવો રંગ આપ્યો,

તો માનજો કે હું રડી રહી છું.