તો જ

તમે સાવ ખાલી થઈ શકો

તો જ નવેસરથી ભરાઈ શકો.

તમે સાવ નિર્વિકાર થઈ શકો

તો જ શૂન્યતાને માણી શકો,

તમે સાવ જ હળવા થઈ શકો

તો જ ગગનમાં ઊંચે ઊડી શકો,

તમે બધું જ મનથી ભૂલી શકો

તો જ વર્તમાનને માણી શકો,

તમે લખેલું બધું જ ભૂસી શકો

તો જ નવા અક્ષરો માંડી શકો,

તમે બેજિજક બધું છોડી શકો

તો જ પરમ તત્વને પામી શકો,

તમે પરાયી વેદનાને વાંચી શકો

તો જ અદ્રશ્યને નિહાળી શકો,

તમે મૌનની ભાષા સમજી શકો

તો જ અંતરનાદ સાંભળી શકો,

તમે ઈચ્છાઓથી મુક્ત થઈ શકો

તો જ મોક્ષ માર્ગને સાધી શકો.