જીવન એક મકરસંક્રાંતિ

જીવનરૂપી આકાશમાં મકરસંક્રાંતિ મસ્ત મસ્તાન છે

સગા અને દોસ્તરૂપી પતંગોથી સંબંધોનું આકાશ જાજરમાન છે,

 

ઉમેદવારરૂપી પતંગ જો ખાતો હોય બહુ ગોથા

પત્નીરૂપી બાંધો પૂંછડી, એવું સામાજીક જ્ઞાન છે,

 

જિંદગીનો પતંગ ચગાવવામાં ફીરકી જો હોય પ્રિયે સંગ

પછી તો આપણી પાસે સાતેય આસમાન છે,

 

લંગરીયાઓ તો મળી રહે છે જીવનનાં આકાશમાં

લંગરીયાઓથી બચતા રહેવાનું હંમેશા આહવાન છે,

 

જીવનરૂપી પતંગ ને મારવા પડશે ઠુમકા કે પોતે જ ચગશે બરાબર

કિસ્મતરૂપી પવનનો એને અનુસંધાન છે,

 

જિંદગીની દોરમાં ક્યારેક ન સમજાય તેવી પડે છે ગૂંચો

ધીરજ ધરજો, આસમાનવાળો કરાવે સમાધાન છે,

 

જેની પાસે અનેરો હુન્નર છે વિચારોની દોરી ને માંજવાનું

એની પાસે ગઝલ, કાવ્યો અને સાહિત્યનો સામાન છે.