જા રે ખારા સમંદર

કદીક મારી આંખોએ, આંસુ થઈ ઉછળે સમંદર,

કદીક સ્વપ્ને મને લાગણીની, ભરતી લઈ છળે સમંદર,

હું એનાં કિનારે રેતમાં, નામ છૂપા ચીતરું પણ,

ફીણ બની એ આવે, ને મનનાં ભાવ કળે સમંદર, 

કોરી જ રહીશ એમ જરા, નક્કી કરી રહું દૂર તો,

મહાકાય મોજું બનીને, પાનીએ આવી મળે સમંદર,

જા રે તું ખારાધૂત રહેજે, આઘો મારાથી સદા !

આમ કહ્યું તો અશ્રુ રૂપે, ખારાશે ભળે સમંદર ! 

એમ મારી તીખી નજર, સળગાવે એનો હૃદય પથ્થર, 

હણી 'મીરાં'ની 'ઝંખના', નદીનાં વિરહે બળે સમંદર !