ઘાયલ પ્રેમી
ઘાયલ પ્રેમી
વિચારોના વાદળો ઘેરાઈ રહ્યા છે,
દિલમાંથી ગર્જનાઓ થઈ રહી છે,
યાદ આવી છે મધુર મિલનની તારી,
મુજને મળી જા ઓ પ્રિયતમા મારી.
નભમાંથી દામિની ચમકી રહી છે,
તુજને મળવાની તડપ વધી રહી છે,
દિલમાં વસાવી છે મેં તસ્વીર તારી,
ન તડપાવ મુજને ઓ પ્રિયતમા મારી.
ઝરમર ઝરમર વર્ષા વરસી રહી છે,
નયનો મારા તુજને તરસી રહ્યાં છે,
વહાવી દે પ્રેમની શીતળ સરિતા તારી,
તરસનું શમન કર ઓ પ્રિયતમા મારી.
વિરહની અગ્નિ દિલમાં ભભૂકી રહી છે,
મુજને સળગાવી ઘાયલ કરી રહી છે,
"મુરલી" ગેરસમજ હવે ભૂલી જા તારી,
દિલમાં સમાઈ જા ઓ પ્રિયતમા મારી.