હવે જીવી લેવી છે !

અદેખાઈનો આ સિતમ પણ,

જરા માણવા જેવો છે,

અવરોધશે એ ખુદ, પછી પૂછશે...

હવે ઉત્સાહ કેવો છે ?

એવી ભલાઈ કેરો ભાવ પણ,

જાણવા જેવો છે,

હશે કારણ વ્યથાનું ખુદ, ને પૂછશે..

હાલચાલ કેવા છે ?

જાહેર છે એ શુભચિંતકો જેનો,

લાભ અહીં લેવા જેવો છે,

કર્યા કરશે ચિંતા ઘણી, પણ કોની ?

ભેદ એ જાણવા જેવો છે !

જલતી જ રાખશે એ આગને જેમાં,

ખુદને બચાવી તમને તપાવે,

પણ રાખશે ખ્યાલ કે ન બનો 'હેમ '

અહીં એ તાગ પામવા જેવો છે.

બિછાવશે કંટકો આડશે ફૂલો તણી,

વળી ચિંધશે માર્ગ હેતથી,

ચાલશો એ ડગર પર જ્યાં, પૂછશે...

પુષ્પો તણી પંપાળ કેવી છે ?

મોઢા ઉપર તો કોઈ ક્યાં બતાવે છે ?

મનમાં રહેલી લાગણીને,

જેવો ઓઝલ થાઉં મહેફિલેથી કે,

કહેશે આપણી જાત કેવી છે !

જેના થકી જિંદગી જીવવા જેવી છે.

બહુ થોડા જ મળ્યા ' મેળ'ના,

અનુભવ્યા જ કર્યું આ સફરમાં ' શૈલ '

એથી'સ્તો હવે જીવી લેવી છે !