હું તો ડુંગરની દીકરી

ડુંગરના ઉરનું હું ગાણું,

ઝીલો તો ઝાંઝરિયું નાણું,

હું તો ડુંગરની દીકરી,

 

થોડી શરમાળી,

થોડી નખરાળી,

રે ભેખડોમાં મ્હાલું મદમાતી,

હું તો ડુંગરની દીકરી,

 

સૂંતા વગડાને ઢંઢોળું,

વનપંખીને મેળે રમાડું,

સીંચીં ધરણીને ભરું રસઝોળી,

હું તો ડુંગરની દીકરી,

 

ઓઢું અંગે શશિ પટોળું,

સંત ચરણોને તિર્થે પખાળું,

ખીલું વન નગરે જોબન વિહારી,

હું તો ડુંગરની દીકરી,

 

માણિગર મારો મહેરામણ,

ઝીલું હૈયે નભ ચીતરામણ,

મઢું મલક ઝીલી મેઘ- મટકી,

હું તો ડુંગરની દીકરી !