હું ફરિયાદ ક્યાં જઈને નોંધાવું

આ પંખી કહે તણખલું તણખલું ભેગુ કરી હું માળો બનાવું,

આ વૃક્ષમાં ઘર બનાવું,

ટાઢ તડકાથી,

મારા કુટુંબને બચાવું,

પણ આ અટકચાળો માનવી,

વૃક્ષ ને જમીનદોસ્ત કરે,

મારું ઘર વેર વિખેર કરે,

હું ફરિયાદ ક્યાં જઈને નોંધાવું ?

આ અંધારું કહે,

સૂરજ લાવે કિરણોની સૌગાદ,

ધરતી પર લાવે ઉજાસ,

મારા અસ્તિત્વનો કરે વિનાશ,

હું ફરિયાદ ક્યાં જઈને નોંધાવું ?

આ વૃક્ષ કહે આ અલ્લડ હવા ક્યાં સમજે સંબંધોની અહેમિયત !

મસ્તી મસ્તીમાં મારા પર્ણો ને કરે મારાથી અલગ,

હું ફરિયાદ ક્યાં જઈને નોંધાવું ?

આ સમંદરની રેતી કહે,

આ દરિયો કેવો મનમોજી,

ઘડીમાં મને ભીંજવી દે,

ઘડીમાં તો રિસાઈ જાય,

આ હવા મને ઊડાડી જાય,

હું ફરિયાદ ક્યાં જઈને નોંધાવું ?

આ બાગ કહે,

કેવી ઈર્ષાળુ આ પાનખર,

વિધવાનાં મુંડન જેવું મારું સ્વરૂપ કરી દે,

 અપહરણ કરી લે મારા રૂપનું,

હું ફરિયાદ ક્યાં જઈને નોંધાવું ?

આ ઝાકળ કહે,

હું તો તરસ છીપાવું ફૂલની,

શોભાવું મોતીની જેમ,

પણ સૂરજ આવી કરે મારા અસ્તિત્વનો નાશ,

હું એની ફરિયાદ ક્યાં જઈને નોંધાવું ?

આ ચકોર કહે,

કેવી નટખટ વાદળી

આંચલમાં છૂપાવે મારા ચાંદને,

દીદારથી મને વંચિત રાખે,

વિરહની પીડા આપે,

હું ફરિયાદ ક્યાં જઈને નોંધાવું ?