ગીત

જનનીના એ હાલરડે રચ્યું હશે એ ગીત,

મમતાના એ મારગડે પ્રગટ્યું હશે એ ગીત.

પ્રાર્થનાના મેદાનમાં લલકાર્યું હશે એ ગીત,

બચપણે બાળગીતોમાં ગવાયું હશે એ ગીત. 

કોયલના આમ્ર કુંજનમાં ટહુક્યુ હશે એ ગીત,

મયૂરના મોરપીંછ થૈકારમાં નાચ્યુ હશે એ ગીત.

પહાડે વહેતા ઝરણાએ માણ્યું હશે એ ગીત,

નદીએ કલકલ વહેતા જાણ્યું હશે એ ગીત.

શ્ર્વાસની સિતારે જાણે વહ્યું હશે એ ગીત,

મહેફિલની વચ્ચે ક્યાંક ગાજ્યુ હશે એ ગીત. 

વાંસળીના સૂરે મધુર વાગ્યું હશે એ ગીત,

રાધાના ઝાંઝરમાં કાઈ રણક્યું હશે એ ગીત.

શબ્દે શબ્દે અંતરમાં વસ્યું હશે એ ગીત,

કવિતાના છંદમાં જાણે હસ્યુ હશે એ ગીત.