દીકરા ક્યારે આવશે તું ?

દીકરા તારી ખૂબ યાદ આવે છે...

ક્યારે આવશે તું ?

થાકેલી ને ઝાંખી આંખો તને જોવા તરસે છે....

ક્યારે આવશે તું ?

નાનો હતો ત્યારે તારી મા ને પૂછતો, મા...પપ્પા ક્યારે આવશે ?

આજે હું તને પૂછું છું દીકરા

ક્યારે આવશે તું ?

મારી આંગળી પકડી પા..પા.. પગલી ચાલતો..

આજે મારા પગ ડગમગે છે..દીકરા..

ક્યારે આવશે તું ?

મારી આંગળી પકડી સ્કૂલે જતો તું..

આજે દેવમંદિર લઈ જવા..દીકરા..

ક્યારે આવશે તું ?

દોસ્તોની મહેફિલમાં સૂટબુટ પહેરી જતો તું..

આજે મારી ચંપલની પટ્ટી સંધાવવાની છે દીકરા..

ક્યારે આવશે તું ?

આત્મદીપ બૂઝાય ને દેહ ઢળી પડે એ પહેલાં..

તારા હાથના ટેરવાંનો સ્પર્શ પામવો છે દીકરા..

ક્યારે આવશે તું ? ક્યારે આવશે તું ?