ચકલીનો ટહુકારો
ચકલીનો ટહુકારો
ચકલીની ચાંચોમાં બેઠેલો ટહુકારો,
મારા તે ફળીએ કોઈ લાવો,
ઓસરીના ખૂણામાં બાંધેલા,
માળામાં વગડાની ચકલી તેડાવો,
કોઈ ચકલીનો ટહુકારો લાવો.
ઘરની આ ભીંતો, આ ઇંટો,
ને ટોડલા, નેવાં ને ધણીયારો મોભ,
ચકલીને તેડાવી ગીતો ગવડાવવાનો,
ઘરના આ ઉંબરને લોભ,
ખોબલો ભરીને કોઈ સુના,
આ માળામાં ચકલીના સૂર બે રેડાવો,
ચકલીની ચાંચોમાં બેઠેલો ટહુકારો,
મારા તે ફળીએ કોઈ લાવો.
સુંદર, સુરેખી ને સ્ફૂર્તીલી કાયા,
વળી પથ્થરિયો આ રંગ રાતો,
નાનીકડી પાંખોમાં આખો,
વૈશાખ જાણે બાહોમાં જઈને સમાતો !
નાના બે પગલાંને સપનાની વેળુમાં,
ચંદરવા જેમ પથરાવો,
ચકલીની ચાંચોમાં બેઠેલો ટહુકારો,
મારા તે ફળીએ કોઈ લાવો.
ધરતી ને આભ આખું રાહ જોઈ બેઠેલું,
ટહુકારો કોઈ સંભળાય,
એના વિના તો આ ફળિયુંય એકલું,
ને અળગે રહીને અભડાય,
છુટ્ટું પડેલું આ માળાનું તરણું,
કોઈ ચકલીની પાસે જોડાવો,
ચકલીની ચાંચોમાં બેઠેલો ટહુકારો,
મારા તે ફળીએ કોઈ લાવો…