ભીનું વાદળ

આજ એક ભીનું વાદળ અંતરમાં અગમ્ય આગ લગાડી ગયું,
એવું લાગ્યું કે વરસાદ બની કોઈ અમથું અમથું છળી ગયું !

અમૃત જેવા અમી છાંટણા પણ કરી ગયા અમોને આજ બરબાદ,
તો કોઈને ભાવ ભરેલી ભીની ભવ્યતાથી કેવું આબાદ કરી ગયું !

હર ચોમાસે ભીનું એકાંત સાચવું છું એકલો હદયની છત્રી વચ્ચે,
ને દંભનો રેઈનકોટ ઓઢીને હર વખત ચોમાસુ છેતરી ગયું !

હવે થાકેલી ધડકનો કરી રહી આંસુના સરોવરમાં છબછબિયાં,
કોણ આ કોરી કોરી પલકો તળે વારિ ઉદાસીનું વરસાવી ગયું ?

અનરાધાર નહીં તો વ્હાલની એકાદી વાછટ બનીને તો આવ વ્હાલા,
હર ચોમાસુ તારા વિરહમાં વાંઝણી તમન્નાઓને તડપાવી ગયું !

એક "પરમ" વાદળ બંધાઈને વરસ્યા કરે આ પાંપણે અવિરત,
એક ચોમાસુ હર ચોમાસે ભીતર તારા પ્રેમમાં "પાગલ" કરી ગયું !