ઠોકર

એ લાગે ને ત્યારે મુસીબત સાથે ત્રાસ મળે છે,

ઠોકર પછી જ એક અનુભવ ખાસ મળે છે.

દરિયામાં સફર કરી ત્યારે તો ખબર પડી,

પાણી વચ્ચે રહીને પણ અહીં પ્યાસ મળે છે.

સૂરજને સાધવો એમ ક્યાં છે સાવ સહેલો,

અંધારાના અનુભવ પછી જ અજવાસ મળે છે.

ને પીડા પ્રસૂતિ સમ ભોગવે છે કવિઓ પણ,

જ્યારે મુશ્કેલીથી એક શબ્દ થકી પ્રાસ મળે છે.

પરિશ્રમ ને પરસેવાનું મૂલ્ય એને જ અંકાય,

થાક્યા પછી જેને જરાક નવરાશ મળે છે.

અફવાઓના સિક્કાઓનું ચલણ વધી ગયું,

સર્વત્ર ભરોસાની જગ્યાએ અંધવિશ્વાસ મળે છે.

છોડો કૃષ્ણ ને,કૃષ્ણત્વ પરખાય જાય તો બસ,

પછી જ દુઃખ સુખનો એક મહારાસ મળે છે.

"પરમ" પથ પર ચાલનાર છે કેટલા અહીં,

લાખો કરોડોમાં એકાદ "પાગલ" ખાસ મળે છે.