રાધા
રાધા
હૂશ્ન ઈશ્કનો એક શાશ્વત ને ખામોશ સંવાદ રાધા,
બે દિલોમાં ધડકતો એક અનોખો અહેસાસ રાધા !
વનવગડામાં મ્હોરેલો કૃષ્ણસમ કામણગારો કેસુડો,
ને ફાગણે હૈયાના આભે સાત રંગોનું મેઘધનુષ રાધા !
વૃંદાવનની વાટે ધરતી ઉપર ઢોળાયેલું ગોરસ,
ને ગોકુળની ગલીઓમાં કાયમ ગુંજતું ગીત રાધા !
મારી શ્વાસોથી તારી શ્વાસો વચ્ચેનો અનન્ય અવિરત,
અસ્તિત્વગત ચાલતો સતત એક મહારાસ રાધા !
સ્પંદનોના વહેતા ઝરણાંનું સૂરીલું સંગીત રાધા,
જે અધૂરૂ હતું જનમોથી તે હવે પૂર્ણ ગીત રાધા !
અંતર આભે ઉમટેલા આ શ્યામ ઘન થકી વરસતું,
ને વિરહમાં કૃષ્ણની આંખેથી વહેતી ધારાનું રૂપ રાધા !
ઓગળેલી અધૂરી ઈચ્છાઓ આંખોથી છલકાઈ ગયા પછી,
શ્યામ વદન પર મલકતું મહોબ્બતનું સ્મિત રાધા !
મારી "પરમ" ઝંખનાઓમાં ઝંકૃત ખામોશી અને
વિહવળ આંખોમાં ચમકતી "પાગલ" પ્રીત રાધા.