આશા
આશા
અંધારી રાત હોત તો સ્મિતની એક જ્યોત પ્રગટાવો,
સન્નાટાની દીવાલો પર બોલકી આશાના રંગ પુરાવો.
પછી છેડશે ખામોશ સિતાર પણ ભવ્ય રાગ ભૈરવી,
આ વેરાન રાતને આશાના ગીતથી આજ ચમકાવો.
જીવનની ઢળતી સંઘ્યાએ ભલેને ફેલાતું આ અંધારું,
અજવાળું કરવા અનુભવના દીપક ઝળહળાવો.
ધરો ધીરજ આશા સાથે હોય ભલે કપરી કસોટી,
કસોટીને લસોટી સૌને સીસોટી સુખની સંભળાવો.
અંધારી રાતના ગર્ભમાં જ સુતેલી છે સોનેરી સવાર,
આ આશાનાં સંદેશ સાથે જ સફર આગળ ધપાવો.
તોડીને પથ્થર પ્રગટે કૂંપળો ને ફૂટે છે ઝરણાં,
ખુદનાં આત્મબળે નિરાશાના પથ્થરો આમ જ હટાવો.
"પરમ" દીપક જરૂર પ્રગટશે એક દિવસ અંતરમાં,
આશાનું ઈંધણ પૂરી જાતને આમ જ "પાગલ" બનાવો.