બાળપણમાં

સમય તું જરાં થોભીજા

મને બાળપણમાં

એકવાર પાછું સરવું છે

સમયની સરીતાનાં

પાછા કિનારે વળીને

ફરી જવું છે

એકવાર બાળપણમાં 

પાછું સરવુ છે

પિતાની આંગળી પકડી 

ધીરે ડગલાં ભરતાં ચાલવું છે

ને એમનાં હાથને હિંડોળે

પાછુ ઝુલવું છે

ન ખાવાનાં નખરાં કરી

મીઠી વઢ ભેળો કોળિયો 

જનેતાને હાથે જમવું છે

દાદીમાની વારતા સાંભળતાં

 નેચાંદામામા - તારલાં જડેલું

આભલું નિહાળતાં

ફરીઘર અગાશીએ સુવું છે

દાદાજીનો ડંગોરો લઈ

ઘોડો ઘોડો રમવું છે

આંગળી પકડીને એમની

મંદિરે પણ જવું છે

ભાઈબેન સાથે ફરીથી રમવુંછે

ને વગર વાતનું ઝઘડવું છે

વળી ચોકલેટ બિસ્કીટના ભાગલામાંથી

એને દઈને પછી જ ખાવું છે

ભેરું સાથે સાઈકલ લઈને

ગામ આખામાં ભમવું છે

સતોડીયું ને સંતાકૂકડી 

મનમૂકીને રમવું છે

ઝાડમાથે ચડી જઈ ને

ડાળીએ ડાળીએ લટકવું છે

જઈ નિશાળે ફરી પાછું

દફ્તરને ફંફોળવું છે

રજાનાં દિવસોને આંગળીએ 

ગણતાં મનમાં મલકાવું છે

વેકેશન પડે એટલે

મામાનાં ઘરે દોટમૂકી જવું છે

પાન પીપર આઈસ્ક્રીમ સઘળું મમ્મીથી સંતાડી

મામા પાસેથી ખાવું છે

સમય તું જરા થોભીજા

મને બાળપણમાં

એકવાર પાછું સરવું છે

જવાબદારી ને સમજદારી

વળીઆ ઉંમરને પડતી મેલી

બીંદાસ બાળપણમાં રોલવું છે

સમય તુંજરાથોભીજા

મને બાળપણમાં પાછું સરવું છે

એને મનમૂકીને માણવું છે

મન મૂકીને માણવું છે