બાળપણમાં એકવાર સરવું છે

સમય તું જરા થોભી જા...

મને બાળપણમાં,

એકવાર પાછું સરવું છે.

સમયની સરિતાનાં

પાછા કિનારે

વળીને, ફરી જવું છે.

એકવાર બાળપણમાં, 

પાછું સરવું છે.

પિતાની આંગળી પકડી, 

ધીરે ડગલાં ભરતાં ચાલવું છે.

ન ખાવાનાં નખરાં કરી,

 મીઠી વઢ ભેળો કોળિયો, 

'જનેતા'ને હાથે જમવું છે.

'દાદીમા'ની વાર્તા સાંભળતાં...

 ને..ચાંદામામા - તારલાં જડેલું આભલું નિહાળતાં,

ફરી..ઘર અગાશીએ સૂવું છે.

'દાદાજી'નો ડંગોરો લઈ,

 ‌ઘોડો ઘોડો રમવું છે.

આંગળી પકડીને એમની,

મંદિરે પણ જવું છે.

ભાઈ બહેન સાથે ફરીથી મને રમવું છે,

ને..વગર વાતનું ઝઘડવું છે.

 વળી, ચોકલેટ બિસ્કીટનાં ભાગલાંમાંથી..

એને દઈને પછી જ મને ખાવું છે.

ભેરું સાથે સાઈકલ લઈને,

ગામ આખામાં ભમવું છે.

સતોડીયુ.. ને સંતાકૂકડી 

મનમૂકીને રમવું છે.

ઝાડ માથે ચડી જઈને,

ડાળીએ ડાળીએ લટકવું છે.

જઈ નિશાળે ફરી પાછું

દફ્તરને ફંફોળવું છે.

રજાનાં દિવસોને આંગળીએથી ગણતાં મનમાં મલકાવું છે.

વેકેશન પડે એટલે..

મામાનાં ઘરે દોટ મૂકી જવું છે.

પાન, પીપર, આઈસ્ક્રીમ સઘળું મમ્મીથી સંતાડી..,

મામા પાસેથી ખાવું છે.

સમય તું જરાં થોભી જા...,

મને બાળપણમાં,

એકવાર પાછું સરવું છે..!

 જવાબદારીને સમજદારી

વાળી..આ ઉંમરને પડતી મેલી..,

બિંદાસ બાળપણમાં

 રોળવું છે..!

સમય..... તું... જરાં...થોભી જા...

મને બાળપણમાં પાછું સરવું છે..!

એને મનમૂકીને માણવું છે..!

મન મૂકીને માણવું છે....!