અમને નહીં ફાવે
અમને નહીં ફાવે
અમે રહ્યાં મરજીવા આ કિનારો અમને નહીં ફાવે,
ગહેરાઈમાં તરનારાં આ મિનારો અમને નહીં ફાવે !
કવનમાં લખવું, યાદોમાં રહેવું અને વાતોમાં વસવું,
અમે શબ્દથી રમનારાં આ ઈશારો અમને નહીં ફાવે !
હસવું, બોલવું, ચુપ રહેવું, રિસાવું અને મનાવવું,
નજીક રહીને દૂરનો આ નઝારો અમને નહીં ફાવે !
ઘૂઘવતાં સાગરની જેમ અંદર તડપતો વલોપાત,
મનને બેચૈન કરતો આ ધખારો અમને નહીં ફાવે !
આપવી હોયતો છલોછલ યાદો લાજવાબ આપી દે,
ઝાકળ ભીના સ્મરણનો આ ગુજારો અમને નહીં ફાવે !