આરઝૂની હૈયા હોળી

સપનામાં હવે તારી યાદો છે વળગી,

ને આરઝુની એક હૈયા હોળી સળગી !

જ્યારથી સ્પર્શી આ શીતળ હવાઓ,

ચિનગારી ભર વસંતે કેવી આ ભડકી !

કેવી અચાનક આવી વિયોગી પાનખર,

જિંદગીથી હવે જિંદગી થઈ અળગી !

તારા ઇંતજારમાં થઈ પથ્થર આ આંખો,

અપલક સ્થિતિએ જિંદગી ગઈ અડધી !

સૂર વાંસળીના થયા છે બેસુર સઘળાં,

ઉદાસ થઈ છે મોરપીંછની આ કલગી !

મર્યાદાના રાજમાર્ગ ચૂકયા તો જોઇલે,

સૂતેલી વાસના મનની થઈ જશે જંગલી !

સંવેદનાઓ સ્પર્શની આ મૃત્તપાય બની

ક્યાંથી લાવું નવા સંચરની હવે જિંદગી !

જળ જમનાના સ્રોત જ સુકાયા સઘળાં,

ને વેરણ થઈ હવે આ રૂદિયાંની કાલિંદી!

નજરનો વાંક ગણું કે હૃદયની તકદીરનો,

ઈશારા પ્રેમના ક્યાં હોય છે એકતરફી !

એક તારા "પરમ" વિશ્વાસનું સિંચન સતત,

જરૂર કરશે સફળ મારી "પાગલ" બંદગી !