આખેઆખી રાત વીતી છે
આખેઆખી રાત વીતી છે
મૂએલુ બાળવામાં આખેઆખી રાત વીતી છે
વચન એક પાળવામાં આખેઆખી રાત વીતી છે,
સરળ છે વાત પણ, સમજાવવાનું એ સરળ ક્યાં છે
બીબામાં ઢાળવામાં આખેઆખી રાત વીતી છે,
હતું પાસે ઘણું પણ સ્પર્શવાનું ક્યાં મળ્યું ક્યારેય
ફકત નિહાળવામાં આખેઆખી રાત વીતી છે,
મળી ગઈ હૂંફ શબ્દોની, ને શબ્દો ઓગળી ગ્યા, પણ
અરથ ઓગાળવામાં આખેઆખી રાત વીતી છે,
નયનનું એક મટકું, ને વળ્યા ખોટી દિશામાં પગ
એ પાછા વાળવામાં આખેઆખી રાત વીતી છે,
દિવસભરની મથામણ બાદ પણ ગમતુ મળ્યુ નહિ, ને
ન ગમતું ટાળવામાં આખેઆખી રાત વીતી છે.