వీధికో నాయకుడు

ప్రజాస్వామ్య దేశంలో

భావప్రకటన స్వేచ్ఛ

ఎవరికి దక్కేనో

అని ఎదురు చూడవలెనా

పరులకు మేల్ తలపెట్టిన

మతి భ్రమణ అని వ్యాఖ్యలు

దేశం గురించి నీకెందుకు

అని ఉచిత సలహాలు

నాకేం అంటే నాకేం

అని విదిలించుకుని పోయేవారిని

నా ఇంటి సమస్య కాదుగా

అని వినీ విననట్టు ఉండే వారిని

చూసి చూసి

ఒక బక్క పలుచని దేహానికి విసుగొచ్చింది

ఆత్మ సమర్పణ భావంతో రాట్నం తిప్పిన చేతులవి

ఈనాడవి మ్రొక్కుతూ యువతను నిదుర లేవమంటున్నాయి

బ్రిటీష్ సామ్రాజ్యాన్ని కదిలించిన సత్యాగ్రహంలో

ఉప్పు తయారు చేసిన చేతులవి

దేశం గురించి కాస్త ఆలోచించమని

నాయకుల్ని దణ్ణాలు పెడుతూ అడుగుతున్నాయి

వీధికో నాయకుడు ఎదురవుతూ

మా పార్టీ జెండా పట్టుకో అని

ఆ చేతులకు పని చెప్పాయి

బరువెక్కిన ఆ చేతులు

భరతమాత వైపు చూశాయి

శ్వాసల్లో కూడా నా దేశం నా దేశం

అని తపించే ఆ ప్రాణి ఇక పోరాడలేను అంటోంది

భారత దేశ త్రివర్ణ పతాకం తాకాలని

ఈ పుణ్యభూమి మట్టిని తనువుకు రాసుకుని

తిరిగిరాని లోకాలకు వెళ్ళిపోయింది

ఆ దేహం

ఎవరైనా ఎప్పుడైనా 

భారత్ మాతాకీ జై అని 

మనసారా అన్నప్పుడు

ఆ చేతులు వందనం చేస్తూ ఉంటాయి

ఆకాశంలోంచి