సాక్ష్యంగా నిలిచిన భారతావని
సాక్ష్యంగా నిలిచిన భారతావని
పాచికలాడిన విధి క్రీడ
కుతంత్రపు సమాలోచన బలంతో
అక్రమ విజయ కేతనం
ఫలితంగా అరణ్య వాసానికి
నెట్టివేయ బడిన
అమాయక పంచ పాండవం
కట్టుకున్న లక్క ఇంటిని పరశురామ ప్రీతి స్వాహాతో
అక్కడ కూడా నిలువ నీడ నీయని
అరాచక దుష్ట గణం
పదునాలుగేళ్ళ అష్ట కష్టాల వనవాసం
ఒక వసంతం ప్రమాదభరిత అజ్ఞాత వాసం
దిగ్విజయంగా ముగించిన యుధిష్ఠిర కూటమి
ఐదూళ్లు సంతృప్తిపై నీళ్లు జల్లి
సూదిమొనకు కూడా తావివ్వక
కయ్యానికి కాలు దువ్విన కౌరవకిరాతకం
యుద్ధ ఖండూతికి బలైన
అక్షౌహిణులు కొద్దీ సేనలు
శత అధర్మ కుత్తుకలు తెగిపడిన క్షేత్రం
అధర్మం పై ధర్మ పోరాటం
తుది గెలుపు ధర్మానిదంటూ
సాక్ష్యంగా నిలిచిన భారతావని