జీవన సంక్రమణం

ఆరుగాలం కష్టాల బరువును

భుజాలకెత్తుకున్న పల్లెతల్లి మానసపుత్రుడు

పొట్టను పాలు పోసుకున్న 

సస్యసిరులు ఇంటికి చేరినప్పుడు

అదికదా అసలు సిసలైన సంక్రాంతి

పౌష్యలక్ష్మి నట్టింట నాట్యమాడుతుంటే

హాలిక హృదయ గోదారి ఉప్పొంగి

కళ్ల కాలువలు కట్టలు తెంచుకున్నప్పుడు

అదికదా అసలుసిసలైన సంక్రాంతి

పసిపిల్లల హృదయ పతంగులు

నింగి చేరి స్వేచ్ఛగా విహరిస్తూ

సంబరం అంబరాన్ని తాకినప్పుడు

అదికదా అసలు సిసలైన సంక్రాంతి

Advertisement

పట్టణాలు పల్లెతల్లి ఒడిచేరి

అమ్మచేతి రుచులతో కడుపు నింపుకుని

సరస సల్లాపాలతో వాకిలి సందడి చేస్తుంటే

ఆదికదా అసలుసిసలైన సంక్రాంతి

ధనం నిండిన జేబుల నాలుకలు

రుచులమాధుర్యాన్ని గ్రోలుతుంటే

ఆకలి కేకలు పెడుతున్న పేద పేగులు

నడిరోడ్డుపై చేస్తున్న కరాళ నృత్యంతో

కాంతి హీనమౌతున్న సంక్రాంతి

జీవన గమనంలో మారిన నాగరికత

సంస్కృతి రాతలను చేరిపేసుకుంటూ

నాటి అనుబంధాల బంధం అవిరౌతూ

నేడు జీవకాంతి కరువైన పెద్ద పండుగ